ភ្នំពេញ៖ ថ្មីៗនេះតារាចម្រៀង និងជាតារាសម្តែង កញ្ញា គៀត សុវណ្ណាឡាង ត្រូវបានមហាជនលួចសរសើរពីទឹកចិត្តរបស់នាងជាខ្លាំង ដោយនាងបានធ្វើកិច្ចការសង្គម ជួយដល់លោកយាយចាស់ជរា វ័យ៧២ឆ្នាំ ដែលកំពុងតែក្រលំបាក នៅក្នុងសហគមន៍មួយ នៃខេត្តកំពង់ឆ្នាំង។
ជាការពិតណាស់ បើទោះបីជាអាកាសធាតុក្តៅហែងខ្លាំង ខុសប្លែកពីទីក្រុងយ៉ាងណាក្តី ប៉ុន្តែកញ្ញាគៀត សុវណ្ណាឡាង និងមិត្តភក្តិជាច្រើនរបស់នាង ក៏នៅតែខំពុះពារ នាំយកថវិកាដែលបានប្រមូលគ្នា ព្រមជាមួយនឹងគ្រឿងឧបភោគមួយចំនួន មកប្រគល់ជូនលោកយាយដល់ក្នុងភូមិ ឲ្យទាល់តែបាន។
លើសពីនេះ ពួកគេថែមទាំងបានសាងសង់ផ្ទះសមល្មមមួយ សម្រាប់ឲ្យលោកយាយរស់នៅបានស្រួលថែមទៀតផង ដែលទាំងនេះគឺជាទឹកចិត្តដ៏គួរឲ្យកោតសរសើរ និងជាគំរូដ៏ល្អមួយសម្រាប់សង្គម ព្រោះថាក្រៅពីសម្រាកលំហែពីការងារ យើងគួរតែអាចឆ្លៀតពេលខ្លះ ដើម្បីធ្វើកិច្ចការងារដែលមានប្រយោជន៍ដល់សង្គម ដូចជាតារាទាំងនេះផងដែរ៕
